(مميزات خط إاتصالات مصر ( الشبكة الثالثة

كلنا سمعنا عن شبكة المحمول الثالثة فى مصر "إتصالات" -التى بدات الخدمة الفعلية من 1 مايو 2007

وطبعا اتصالات نزلت امام موبينيل وفودافون ال تقريبا واخدين السوق المصرى كل مناصفة بينهم وكان هناك تحدى ان تاخذ شركة اتصالات نسبة من سوق المحمول فى مصر لان موبينيل وفودافون مطمنين ان الناس كلها اشترت موبايلات من زمان ومفيش حد عنده استعداد يغير رقمه ويجيب خط من اتصالات وحتى لو حد اشترى خط من اتصالات بتفضل عنده مشكلة انه عايز يحتفظ بخطه ورقمه القديم سواء على موبينيل او فودافون لان فى ناس كتير معاها الرقم القديم ومش هيعرف يبلغهم بالرقم الجديد وبالتالى امامه 3 حلول

1

يشترى موبايل جديد ويمشى معاه 2 موبايل - واحد برقمه القديم القديم والتانى بخط اتصالات

2

يحول المكالمات من الخظ القديم على خط اتصالات وده هيكلف كتير لما حد هيتصل بيه على الرقم القديم - لان بيتخصم منه ثمن المكالمة على الخط القديم

3

الحل الثالث وده اغلب الناس شغالة بيه - اشتروا خط اتصالات الجديد وشاليين شريحة خط اتصالات فى المحفظة - ومشغلين الخط القديم وبيبدلوا الشرايح عند الحاجة وده طبعا حل مرهق - كل مرة تغير الشريحة تفك الموبايل والبطارية وتغير الشريحة و تظبط الساعة والشريحة تقع و تضيع الخ الخ من هذه المشاكل ولكن دائما هناك حل عبقرى وهو اختراع جديد اسمه الشريحة الزكية

ودى شريحة بتشتريها من شارع عبد العزيز فى حدود 50 جنية وتخليك تضع خطك القديم وخط اتصالات الجديد فى موبايل واحد

اه والله الشرحتين فى موبايل واحد وتبدل بين الخط القديم وخط اتصالات بمجرد لمسات على القوائم فى الموبايل

:ملحوظة

خط واحد ال بيشتغل فقط - مش الاثنين فى نفس الوقت - يعنى لو حولت على خط اتصالات من القائمة سوف يغلق الخط القديم وال هيتصل على القديم سوف يسمع رسالة مغلق و نفس الكلام لو حولت على الخط القديم سوف يغلق خط اتصالات

يعنى الشريحة الذكية دى بتغنيك عن فك الموبايل وتغير الشريحة كل مرة عايز تشغل فيها خط اتصالات مش بتشغل الخطين مع بعض وانا بكرر اهو منعا للبس - لمزيد عن المعلومات عنى الشريحة الزكية ادخل هذا الموقع

http://www.simore.ch/en/

يعنى ملكش حجة دلوقتى - انزل هات خط اتصالات فورا وتمتع بكل هذه المزايا وخلى موبينيل وفودافون يطوروا نفسهم بدل ما كل همهم انهم يلموا فلوس من المشتركين وخلاص

محدش يقولى ان اتصالات شبكة ضعيفة ومش مغطية كل المناطق وكلام من ده لان مش ده الفيصل - لانهم لسا بيقولوا ياهادى ولسا شغالين من يادوبك شهر وهما بيطوروا نفسهم بسرعة وجودة الخدمة والتغطية تتم بمعدل سريع جدا على العكس فى موبينيل وفودافون نايمين فى الدرة لانهم مطمنين ان كل الشعب المصرى معاه موبايل دلوقتى

على فكرة موبينيل وفودافون لو وجدوا ان نسبة مشتركيهم فى انخفاض مستمر بسبب اقبال الناس على اتصالات ساعتها هيكونوا مرغمين انهم يطوروا نفسهم ويرخصوا الاسعار والا هيخسروا مزيد من المشتركين

وهذه بعض المميزات التى تمتاز بها اتصالات عن موبينيل وفودافون - احكم بنفسك وشوف الفرق

(1)

معرفة رصيدك مجانا بدلا من 20 قرش فى موبينيل وفودافون وذلك بالكود

*555#

من الشمال لليمين اضغط نجمة ثم 5 5 5 ثم شباك ثم اضغط اتصال

(2)

معرفة الارقام التى اتصلت بك وتليفونك مغلق او خارج نطاق الخدمة وذلك مجانا عن طريق رسالة تصلك مجانا بدلا من اشتراك شهرى خمسة جنيه فى موبينيل و 50 قرش للرسالة فى فودافون

(3)

قيمة كارت الشحن بدون ضريبة المبيعات اى ان سعر الدقيقة يقف عليك ب 34 قرش مقارنة ب موبينيل وفودافون وذلك اذا كنت مثلا تشترى كارت ال 10 جنيه بالسعر الرسمى وهو 11.5 جنيه اما اذا كنت تشتريه اغلى من الموزعين ب 12.5 جنيه فسعر الدقيقة يكافىء فى هذه الحالة فى خط اتصالات 29.5 قرش

(4)

لك 5 دقائق شهريا مجانا مدى الحياة وتبدأ من يوم 1 فى الشهر وتصبح الدقائق المجانية سارية بمجرد اجراء مكالمة مدفوعة واحدة فقط لمدة دقيقة واحدة فقط فى اول كل شهر وذلك العرض مفيد لمن يتكلم قليلا اى لن يحتاج لشحن كارت الا كل فترة طويلة جدا وفى نفس الوقت التحدث مجانا لمدة 5 دقائق مجانا كل شهر

(5)

تستطيع الدخول على موقع اتصالات على الانترنت مجانا تماما ومعرفة الاخبار ومواقيت الصلاة وخلافه عدد لانهائى من المرات سواء بالجيل الثالث او الجيل الثانى ونصف "الجى بر ار اس" للتليفونات التى لا تدعم الجيل الثالث مثل نوكيا 6600 بدلا من 1 جنيه فى اليوم فى فودافون كما ان سعر تحميل الاغانى من على الموقع موحد ب 4 جنيه بدلا من اسعار متغيره على موقع فودافون وطبعا موبينيل خارج المنافسة فى هذا المجال

(6)
لك 3 ميجا بايت انترنت فى الشهر لاى موقع مجانا تماما ولم يعلن عن نهاية العرض حتى الان بعكس فودافون التى اعطت 5 ميجا بايت كل يوم ولكن يتم خصم 1 جنيه كل يوم تدخل فيه على الانترنت للاستفاده من العرض وطبعا موبينيل خارج المنافسه ايضا العيب فقط ان سعر الميجا فى اتصالات 7.5 جنيه بعد ما تخلص ال 3 ميجا المجانيه وفى فودافون 5 جنيه فقط ولكن اتصالات نزلت بالعرض اولا فقامت فودافون بعمل سعر اقل

(7)

تستطيع الدخول على موقع اتصالات او على اى موقع انترنت حتى لو رصيدك كام قرش بعكس فودافون التى لاتسمح بالدخول على الانترنت الا اذا كان رصيدك اكثر من 6 جنيه اما موبينيل انسى يا معلم - بتحسبك بالكليوبايت يعنى اى صفحة بتفتحها بتخصم منك على الاقل 15 قرش والساعة بخمسة جنية والحسابة بتحسب - يعنى لو حاولت تبعت ايميل وتقرا الاخبار هتخلص رصيك كله

(8)
mmsرسائل
سعر الرسائل الملتي ميديا ب 75 قرش بدلا من 95 قرش فى موبينيل وفودافون

(9)

خدمة رنتك اغنيتك صوت الاغنيه فيها اقوى واوضح وهى بسعر 4 جنيه للاغنيه فى الشهر + 19 قرش سعر الدقيقة فى المكالمة لاختيار الاغنيه

-

(10)

سعر مكالمة خدمة العملاء 333 ب 39 قرش مهما طالت مدتها بعكس فودافون فيها سعر المكالمة ب 50 قرش

وموبينيل 150 قرش ويمكنك الاتصال بخدمة العملاء على الخط الارضى بتكلفة مكالمة محلية فى حدود عشرة قروش على الرقم 5346333 من القاهرة الكبرى ودا هينفعك لو بتظبط الموبايل معاهم على التلفون - تبقى ماسك الموبايل بتظبطه فى يد وبتكلمهم على الخط الارضى باليد التانية

-

(11)

خدمة ارسال رسالة فيها كلمة كلمنى شكرا مجانا لاى موبايل فى الثلاث شبكات فى مصر لكل الاكواد 011 و 012 و 018و 010و 016 مش زى فودافون ال لغاية دلوقتى مش عارفين ان فى شبكة ثالثة كودها 011 وتديك رسالة خطا فى الرقم لو حاولت تبعت الرسالة لشبكة اتصالات - ده طبعا غير موبنيل ال مش شايفة غير نفسها ومش بتبعت اللا لموبينيل فقط ويمكن الارسال على اتصالات حتى 3 مرات فى اليوم عن طريق الكود

*111*رقم الشخص المرسل اليه#

من الشمال لليمين اضغط نجمة ثم 1 1 1 ثم نجمة ثم رقم التليفون ثم شباك واضغط اتصل

(12)

يمكنك ايضا معرفة عدد الدقائق المجانية المتبقة لك كل شهر على طريق الكود

*558#

من الشمال لليمين اضغط نجمة ثم 5 ثم 5 ثم 8 ثم شباك ثم اضغط اتصال

(13)

خدمة المحادثة الجماعية حتى 6 اشخاص مجانا وتسمح هذه الخاصية باشتراك 6 أفراد في نفس المكالمة. فعندما تكون على اتصال بشخص يمكنك استبقاءه على الخط والشروع في الاتصال بشخص ثان وإذا رد عليك الشخص الثاني يمكنك استئناف المكالمة مع الاثنين في نفس اللحظة كما يمكنكم أنتم الثلاثة التحدث إلى بعضكم البعض - اما موبينيل وفودافون هذه الخدمة متاحة باشتراك وفقط لعملاء الاشتراك الشهرى مش للكروت - صباحو بيزنيس يا معلم

(14)

خدمة تحويل المكالمات لاى رقم حتى لو رقم غلط لزوم الهروب من بعض الاشخاص الغير مرغوب فيهم باعطائهم رسالة الرقم المطلوب غير موجود بالخدمة علشان ييئسوا ومايتصلوش تانى - هذه الخدمة غير متاحة فى موبينيل - لتحويل المكالمات لرقم غلط والهروب من الاشخاص المزعجة استخدم الكود

**21*0101457373#

من الشمال لليمين اضغط نجمة ثم نجمة ثم 2 ثم 1 ثم نجمة ثم رقم0101457373

ثم شباك ثم اضغط اتصال

للالغاء هذه الاشتغالة
##002#
من الشمال لليمين اضغط شباك ثم شباك ثم 0 ثم 0 ثم 2 ثم شباك واضغط اتصال

:ملحوظة

لو هتحول المكالمات على رقم غلط مش هتتحسب عليك ورصيدك مش هينقص - يعنى تهرب من الناس الغلسة ببلاش - انما لو حولت المكالمات على رقم شغال وحد اتصل بيك والطرف ال انت محول عليه الارقام فتح الخط فى الحالة دى هيخصموا منك ثمن المكالمة

-

(15)

خدمة البريد الصوتى مجانا مثل فودافون بينما 50 قرش للدقيقة فى موبينيل

-

(16)

اول 3 دقائق من كل مكالمة فيديو مجانا يعنى اتكلم 3 دقائق واقفل واتكلم تانى حتى لو 100 مرة فى اليوم بعكس فودافون التى تعطى20دقيقة فقط حتى اخر يونيو 2007 فقط ولاتعرف اذا كنت خلصت الدقائق بتاعتك ام لا - انت ونصيبك بقى متعرفش امتى هيخصموا ولكن فى اتصالات لم يعلن عن نهاية هذا العرض حتى الان وطبعا موبينيل خارج المنافسة فى هذا المجال

(17)

خاصية الانتظار ودى موجوده فى كل الشركات

*43# للتشغيل

#الالغاء #43

الجديد فى اتصالات بقى انها شبكة ذكية يعنى مش كفاية انك يكون عندك انتظار دى كمان بتقولك ان الشخص الاخر معاه مكالة وانت دخلته عليها يعنى لمل تكون صاحبتك بترغى فى الموبايل بتاعها سواء كان موبينيل او فودافون "الله اعلم بقى هى بتكلم مين بقى يا معلم" وانت بتتصل بيها من خط اتصالات هتخشلها على الويتنج وساعتها شبكة اتصالات هتقلك ان صاحبتك بتتكلم فى الموبايل دلوقتى وانت دخلتاها على وايتنج - وانت وشطارتك بقى يا معلم ، ابقى اعرف صاحبتك كانت بتكلم مين - معلش احنا جايين نهدى النفوس

-

(18)

تتيح لك اتصالات أن تتصل بالشرطة والمطافئ والإسعاف مجانا في أي وقت حتى لو لم يكن رصيدك يسمح بذلك

يعنى لقدر الله فى حالة الحوادث على الطرق اتصل بخدمة الاغاثة السريعة 0121110000

المطافى 180

شرطة النجدة 112 او 122

123 الاسعاف

(19)

والجديد انه من اليوم الخميس 7 يونيو 2007 شكبة إتصالات تعمل وتغطى جميع انحاء الجمهورية وكل الطرق الصحرواية والزراعية وليس المدن الكبرى فقط بفضل اتفاقية التجوال المحلى بين الشبكات

http://www.masrawy.com/News/2007/Egypt/Economy/june/15/etislat.aspx

(20)

الشبكة الوحيدة ال تخليك تختار رقمك بنفسك على النت يعنى تختار رقمك هو تاريح ميلادك او تألف رقم متميز يعجبك - الخدمة متوقفة الان لتحضير ارقام متميزة جديد يلا الحق رقمك فى الفترة القادمة

http://dial.etisalat.com.eg/dial/pub/faq.do

(21)

لو الحالة مقشفرة معاك ورصيدك خلص ومعكش غير جوز جنيهات خش على اى محل مكتوب عليه اشحن اتصالات هنا - ممكن تشحن رصيدك حتى لو بحنية- يعنى هتدفع جنيه رصيدك هيزيد جنية مش زى الشبكات التانية اقل حاجة تشحن بيها 5 جنية ده لو لقيت اصلا حد عنده كرت بخمسة جنية من اساسه

(22)

تحويل الرصيد - مفيش حد ادنى لتحويل الرصيد مش لازم تحول 5 جنية زى الشبكات التانية يعنى لو صاحبتك معهاش رصيد - الله اعلم هى بتخلص رصيدها على مين ، متنساش احنا جايين نهدى النفوس- وعمالة تزن وتبعت فى رسائل كلمنى شكرا وانت الحالة برضة مقشفرة معاك ممكن تحولها جنيه واحد بس وترتاح منها وتقولها اوعى تضيعى الرصيد تانى - على الاقل ضامن انها هتكلمك انت بالجنيه ده مش حد تانى

(23)

الجديد من اتصالات انها عملت باقة اوبشينز التى تجمع بين الكرت ونظام الفاتورة مما يحقق اقل سعر للدقيقة فى مصر طوال اليوم وعلى مدار الاسبوع و سعر الدقيقة لايختلف سواء كان كنت بتتصل بتليفون عادى او محمول لتحقق المعادلة الصعبة وتجعل سعر الدقيقة قريب جدا من نظام البيزنيس ولكن بدون اشتراك شهرى - لمزيد من المعلومات

http://etisalat.com.eg/arabic/personal/options/

(24)

واحدث عروض الصيف - تخفيض 33% على سعر الدقيقة طوال اليوم وجميع ايام الاسبوع حتى اخر موسم الصيف - يعنى تتكلم 90 ثانية بسعر دقيقة واحدة وتتكلم 3 دقائق بسر دقيقتين - وهذا العرض لكل عملاء اتصالات - عيش حياتك فى الصيف طوال اليوم مش ذى موبينيل وفودافون ال يخلوك تستنى لبعد الساعة واحدة باليل علشان تتكلم براحتك

هذا وقد وصل عدد المشتركين فى اتصالات حتى الان الى ما يقرب من مليون مشترك حتى الان

وكنت قد سمعت انها عامله عرض

الخط + نوكيا إن 70 بــ 950 جنيه

الخط + نوكيا إن 73 بــ 1250 جنيه

ولكن لا اعرف مدى صحة الخبر او معلومات كافيه عنه لذلك من يعرف اى معلومات يا ريت يقول لنا

Condo Hotels